- 774 -

1453. Mai 18. Wien.

König Ladislaus gebietet, dass die Lehnsmannen der böhmischen Krone mit ihrem Pferdedienst den Bürgern zu Liegnitz gewärtig sein sollen.

Wir Lasslaw von gots gnaden zu Hungern, zu Behem, Dalmacien, Croacien etc. kunig, herczog zu Osterreich vnd marggraf zu Merhern etc. bekennen fur vns vnd vnsere erben vnd tun kund mit dem brief, daz wir wol vnderricht sein worden, wie daz die erbarn, vnsere getrewn lieben ratmann vnd gemain vnserer stat Legnicz ee dann wir zu regierung vnserer kunigreich vnd lande komen sein, von vnserer erblichen gerechtikait wegen, so vns vnd vnserer kron zu Behem an dem lannd vnd der stat Legnicz zugeuallen ist, von den Sleszischen fursten vnd andern hart angefochten vnd bekriegt sind worden, darinn sy kainen schucz vnd scherm von niemanden gehabt denn allain sy sich selbs solhes wider halten vnd erwert habent, daz wir denselben vnsern burgern ratmann vnd gemain zu Legnicz zu ergeczung solher irer getrewn dienst vnd loblichen widerstannds nach des hochgeborn fursten vnsers lieben oeheim Vlreichen grauen zu Cily, zu Ortemburg vnd in dem Seger, vnsers Ban in Windischen lannden vnd anderer vnserer ret zeitigem vnd vorgehabtem rat, von den lehen, sy sein rittermessig oder andere lehen, so sy von vns vnd vnserer kron zu Behem vnczher gehatt vnd besessen haben, den pherddienst, den sy nach lehensrechten vns vnd vnserer kron zu Beheim dauon zu tun pflichtig sind, von kuniglicher macht vnd rechter wissen gegeben haben vnd geben als ain kunig zu Behem, seczen, mainen vnd schaffen in kraft des briefs, daz dieselben lehnsmannen vnd ir lehenserben dieselben ire lehen mit irem pferd dienst den vorgenanten vnsern burgern, ratmannen vnd gemain vnd irn nachkomen zu allen irn vnd der stat notdurften gehorsam vnd wartund sein vnd vordienen sullen, als solher lehen vnd lannds recht ist. Vnd sullen auch diselben lehensmann vnd ir lehnserben solhes dinstes von vns vnd vnsern erben, konigen zu Behem an iren lehensrechten vnengolten vnd .... beleiben. Doch vns vnd vnsern erben, konigen zu Behem ......... lehenschaft vngeuerlich. Mit vrkund des briefs geben zu Wienn am fritag vor dem heiligen Pfingsttag, nach Kristi gepurde vierczehenhundert darnach im dreivndfumfczigisten vnserer kronen, vnsers reichs des Hungrischen im drewczehenten jare.

O. d. St. L. No. 420. Ohne Siegel und Schnur, sehr beschädigt.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866